Tauākī Kaupapahere
Hei kaitukumahi haepapa e mahi ana puta noa i ngā hapori pūmanawa herekore ā-ao e hira ana te kanorau me te manaaki tangata i Catalyst.
E āhukahuka ana mātou, e whakanui ana, me te whakapau kaha ki te whakanui i te kanorautanga puta noa i tō mātou whakahaere.
E whai tonu ana mātou ki te hanga i te wāhi mahi kanorau ake mā te whakatairanga i te whiwhi ōritenga me te whai wāhitanga. Ko tā mātou e hiahia ana kia wāhi manaaki tonu a Catalyst i te katoa, kia whakaata anō hoki i ā mātou kaimahi i te kanorau o Aotearoa me te porihanga ā-ao.
Mā te whakatenatena i te piki tonu o te kanorautanga puta noa i Catalyst e āwhina ki te whakapoapoa me te pupuri i ngā kaimahi tautōhito, me te aha, ka pai ake ā mātou rongoā, otinga anō hoki mā ō mātou kiritaki.
Tā mātou tauākī kanorau
Kua here a Catalyst ki te whakamahi i ngā pūmanawa me ngā utauta herekore tino pai rawa o te ao hei whakarato i ngā otinga, rongoā hoki mā ō mātou kiritaki huri noa i te ao mō te 20 tau. I tua atu i tō mātou kaingākautanga ki ngā pūmanawa herekore, he kamupene mātou e ū ana ki ngā whai wāhitanga ōrite mō te katoa, ahakoa ngā āhuatanga takitahi o tēnā, o tēnā.
He tauira o aua āhuatanga ko te ira tangata, te pakeke, te ahurea, te hauātanga (ā-hinengaro, ā-ako, ā-tinana), te kapapori matawhenua, ngā reo kōrero, te tūnga mārena, ā-hoa rānei, te āhua ā-tinana, te mātāwaka, te whakapono, te tuakiri ira tangata, aronga taera rānei.
He aha ā mātou mahi hei whakatītina i te kanorautanga me te whakaatu manaakitanga?
- E tuku kōrero ana mātou mō tā mātou kaupapahere kanorautanga me te tuku hononga ki te kaupapahere katoa i ngā pānuitanga tono kaimahi katoa kia mōhio ai ērā ka whiwhi mahi pea i waenga i a mātou he mea hira te kanorautanga. E āta tuhia ana ā mātou pānuitanga tono kaimahi ki te whakaatu he wāhi mahi tēnei e manaakitia ai te katoa, mā te whakamahi pūmanawa ki te āta tirotiro i ā mātou kupu kei kitea he kupu aukati i roto.
- Kua whakarato whakangungu mātou ki ngā kaimahi mō te tono kaimahi kia piki ai tō rātou aweko ki ngā kupu, whakaaro aukati kia tino tōkeke rawa ka taea ngā tukanga tono kaimahi ahakoa he aha ō rātou kapapori.
- He kaha tā mātou whakatītina i ngā rōpū e iti nei te whai whakaaro ki ngā aramahi pea i te rāngai hangarau mōhiohio, ki te whai whakaaro ki te whai mahi i ngā pūmanawa herekore.
- He rarata ā-whānau mātou. Ko tā mātou he āwhina kaimahi ki te whakataurite i ngā haepapa ā-whanau me ngā haepapa mahi, tae atu ki ngā kōwhiringa mahi hangore.
- E whakarite ana mātou kia taurite tonu te tapeke o ngā ākonga wahine ki tō te tāne i tō mātou Catalyst Academy.
- Kua oti he arotake ā-roto hei whakarite kia tōkeke te pāpātanga e utua ai ā mātou kaimahi.
- E whakapāhunu ana mātou i te reo whakatoihara, reo aukati rānei.
- E mahi ana i te taha o ō mātou kiritaki ki te hanga pūnaha ka taea e te hunga kaimahi hauā ā-tinana.
- Ka whakarato i te whakangungu urutanga ki ngā kaimahi, ngā kiritaki me te hapori whānui.
- Ka whakarato i ngā wā ako reo Māori me te āta whakatenatena i te kōrero i te reo Māori i te wāhi mahi.
- Ka whakarato i ngā akoranga reo Ingarihi hei kōwhiringa ki ērā o ā matou kaimahi ko te reo Ingarihi tō rātou reo tuarua.
- E tautoko ana i ngā kaimahi e hou ana ki tō mātou ahumahi mā tō mātou Catalyst Academy, ngā tāhua mātauranga, me tō mātou hōtaka tauiratanga.
- Kua whakapuakina e ētahi o ā mātou kaimahi te whānuitanga o ngā kauwhau mō ngā kaupapa rerekē ā-ahurea, ā-ira tangata anō hoki.
He aha ā mātou mahi whai ake hei whakatītina i te kanorautanga me te whakaatu manaakitanga?
- Ka arotake tonu mātou i ā mātou panoni ki ngā tukanga tono kaimahi hou ki te whakarite i te pikinga tonutanga o te pai, ā, ka kohikohi urupare i ngā kaitono hei āwhina mai ki te whakaoti i ētahi atu whakapainga ina hiahiatia.
- Ka whai mātou ki te whakaatu i tō mātou kanorautanga nui ake i ngā tūnga kaihautū hei whakatītina i te kanorautanga i waenga i ngā kaitono mahi.
- Mā mātou he arotake ā-roto e whakahaere ki te whakarite i te pūrite haere tonu o ngā utu kaimahi, i ia toru tau i te iti rawa.
- Ka haere tonu ā mātou mahi aukati rawa i te whakatoihara, te nonotitanga rānei ahakoa he aha te momo, i ngā taumata katoa o te whakahaere.
- Ka whakatenatena haere tonu mātou i ētahi atu wānanga, mātauranga anō e pā ana ki ngā take kanorau (hei tauira, ā-tuihono, ā-tinana hoki)
- Ka whakarato i te hōtaka whakangungu koreutu e aro atu ana ki ērā rōpū kāore e tino kitea ana i tō mātou hapori hangarau.
- Ka whakaatu tūmatanuitia tēnei kaupapahere hei takohanga tāpiri mō mātou.
Mā wai e kawe te haepapa mō te kanorautanga me te manaaki tangata?
Mā ngā kaimahi katoa o Catalyst e noho haepapa ana ki te whakatenatena i te kanorautanga me te manaakitanga mā te whakaatu i te manawaroa, te whakaute me te arotau tētahi ki tētahi.
Mā ngā Kaiwhakataka me te Rōpū Whakahaere o Catalyst e haepapa ki te whakatairanga i te ahurea kanorau me te manaaki puta noa i tō mātou whakahaere.
Kei te Rōpū Tāngata Catalyst te takohanga mō te whakaemiemi i ngā mōhiohio tauanga tōtika mō tā mātou koke ki te kanorautanga nui ake, me te whakarite he wairua manaaki tō ngā tukunga whakahaere kaimahi.
Kei te hiahia whakamahi i tā mātou Kaupapahere Kanorau me te Manaaki i tōu anō whakahaere? Kua tukuna e mātou ki te CC BY-SA 4.0